Kato Pusako = ILMU

Nan dikatokan ilimu

Adolah kayakinan bapandirian
Jadi katatapan dalam hati
Punyo alas an dalam pikiran

Ilimu ado ampek macamnyo
Partamo ilimu pitunjuak
Kaduo ilmu najwa
Katigo ilmu takwa
Kaampek ilimu rasik

Nan dikatokan ilimu pitunjuak
Pangatahuan nan ditarimo sadang bahadokan
Nan dikatokan ilmu najwa
Ilimu maso lampau disabuik juo ilimu sajarah atau ilimu bakahandak
Nan dikatokan ilimu takwa
Ilimu kajadian nan kadatang atau disabuik juo ilimu bahati hati
Nan dikatokan ilimu rasik,
ilimu nan dating dari nan maha kuaso malalui hati nurani manusia
baiak lahie maupun batin, disabuik juo ilimu kabanaran

sipaik ilimu ado duo macamnyo
partamo ilimu dipahamkan
kaduo ilimu diparangaikan

nan dikatokan ilimu nan dipahamkan
Adolah ilimu nan mamakai taratik sopan,
Umpamo ilimu padi, makin barisi makin runduak

Nan dikatokan ilimu nan diparangaikan
Dima tagak sinan barundiang
Dima duduak sinan mangecek
Bagai sipak anjalai, balun barisi alah mangacambah

Ampek macam ilimu pangatahuan
Partamo ilimu pangatahuan tantang diri
Kaduo ilimu pangatahuan tahu tantang urang lain
Katigo ilimu pangatahuan tahu tantang alam
Kaampek ilimu pangatahuan tahu pado nan kuaso

Nan dikatokan ilimu pangatahuan tantang diri
Manggunokan raso jo pareso, manimbang sakik jo sanang
Kalau dipiciak sakik diawak, diurang baitu pulo
Apo nan tajadi dirasokan pado diri sandiri

Nan dikatokan ilimu pengatahuan tahu tantang urang lain
Dileik pado panyababnyo bagai ilimu mamanciang ikan
Lain lubuak lain ikannyo, lain ikan lain umpannyo
Babagai ragam alan, hitam putiah, tinggi randah,
indak disamo ratokan sajo

Nan dikatokan ilimu pangatahuan, tahu pado alam
Jikok mamarentah dalam kampuang,
Jikok tajadi silang sangketo, tibo di nan sainduak atau nan sapayuang,
Mayalasaikan indak buliah barek sabalah.
Luruik jo adie dipagunokan bana

Nan dikatokan ilimu tahu pado nan kuaso
Tau di asa jo sipaiknyo
Dikajie sipaik nan mustahie sarato jo nan wajib
Basyariaik jo bahakikaiak, batarikaik bamakripaik

Jikok manuntuik ilimu
Kalo Babue jo nan pandai
Kok labiah pandai dari kito
Randah hati nan dipakai
Bialah kaniang baluluak
Asa tanduak lai kamakan
Ilimu padi nan kadipakai
Makin barisi makin runduak

Kok bapikia kapalang aka
Bailimu kapalang paham
Bak alu pancukia duri

Sumber : Buku Kato Pusako AB. DT Majo Indo